Hant com iti cöiihca ac hiz cötahca hax tama xica ccam com toc cotom hant com iti toom toc comom. Ox tpacta toc cöiihca iti xazoj tintica hant z itaao toc conticaha.
Ziix quih ccam taaxo ipocaaho ox xah zo haiiha. Toc contiha iti zaaj pac toc cötahcama cötafpma hapxa pac ano toii toc cöcoiiha. Zo toc cotomma itiipjc hant iqui itasnanma toc cotom yoque.
Xazoj cop ox tee yoque:
— ¡Ctam hipcom islicot ac hax xomasolo! — ox itai yoque.
Ox tpactama hapxa com ox tee yoque:
— Ox yopacta. Xazl quih ctamcö quih caacöl quih htacotim taa iti hihacosotimihi ox yopacta — ox tee yoque.
Ox tee itaxi mos ox tee yoque hapxa com:
— Xazoj ilit zo toc cöyiij. Tiix hapx ihcaitajc. Zo hpoohit ihpooxi hizac conthapa xazoj ihmiha cohseectim — ox tee yoque.
Ox tpactama zaaj quih ipot tahac taax xcatnij xah yopah mojepe cöcootij quih ano quiijiha.
Taaxah zo haa motama hapx iqui tahqueetx hant tahmasilim hanso taxaximma xazoj cop itii ziix ticom itacatx hapx iqui tpanzx yoque.
Tojozma hapx iqui tpanzxma hapxa coi mos hapx hant cöteme hapx iqui tpancoj yoque.
Ox tpactama haa ntihat iti hehe cöcootij ox quisoj an quinej zo haa toomma tiix an hant cösiime ta cötazcamma ox tee yoque ziix cöcaasitim quij.
— He ipot icp ac icp hasomaha. He haa cohptaasitimma toii nthamat — ox tee yoque.